کراچی: (دنیا نیوز) پاکستان کرکٹ ٹیسٹ ٹیم کے کپتان اظہر علی کا کہنا ہے کہ بنگلادیش کرکٹ بورڈ کے پاس کوئی بہانہ نہیں کہ وہ یہاں نہ آسکیں۔
کراچی میں میڈیا سے گفتگو کرتے ہوئے ان کا کہنا تھا کہ کھیل میں سیاست نہیں ہونی چاہیے، کیونکہ کھیل کا سیاست سے کوئی تعلق نہیں۔
ٹیسٹ ٹیم کے کپتان کا کہنا تھا کہ سری لنکا ٹیم پاکستان کا دورہ کر چکی ہے، امید ہے جلد پاکستان بنگلا دیش سیریز کا کوئی مثبت حل نکلے گا۔ نیٹ پریکٹس میں پر اعتماد پریکٹس کرتا تھا لیکن بدقسمتی سے رنز نہیں کر پا رہا تھا۔
اظہر علی کا کہنا تھا کہ کراچی میں پاکستان اور سری لنکا کے خلاف دوسرے ٹیسٹ میچ میں سنچری کی، کارکردگی میں تسلسل کی کوشش ہے۔
دانش کنیریا کے حوالے سے ان کا کہنا تھا کہ 100 فیصد یقین ہے کہ کسی بھی کھلاڑی کے ساتھ امتیازی سلوک نہیں ہوا۔ دانش کنیریا کےساتھ خود بھی ٹور کیا ہوا ہے اس طرح کا سلوک کبھی پاکستان ٹیم میں نہیں ہوا نہ مجھے یقین ہے کہ ایسا ہوا ہو گا۔
