لاہور: (ویب ڈیسک) آسٹریلوی کرکٹ ٹیم کے سابق بلے باز اور پاکستان سپر لیگ (پی ایس ایل) میں بلوچستان کے دارالحکومت کوئٹہ کے نام سے مشہور ٹیم کوئٹہ گلیڈی ایٹرز کے کھلاڑی شین واٹسن نے قوم کو اُردو زبان میں پیغام دیدیا۔
سماجی رابطے کی ویب سائٹ ٹویٹر پر ایک ویڈیو پیغام کے ذریعے انہوں نے قوم کے نام اردو زبان میں پیغام دیا، یہ ویڈیو کوئٹہ گلیڈی ایٹرز کی سماجی رابطے کی ویب سائٹ پر نشر کی گئی۔
یاد رہے کہ پاکستان کرکٹ بورڈ کی طرف سے پی ایس ایل کے شیڈول کا اعلان کر دیا گیا، شیڈول کے اعلان کے ساتھ ہی شائقین کرکٹ کے جوش و خروش میں اضافہ ہو گیا اور پوری شدت کے ساتھ لیگ کے آغاز کے منتظر ہیں۔ مقامی اور انٹرنیشنل کرکٹرز بھی پانچویں ایڈیشن کے حوالے سے انتہائی پرجوش ہیں۔
Pakistanio @ShaneRWatson33 Aarha Hai Pakistan
— Quetta Gladiators (@TeamQuetta) January 3, 2020
Aap Sab #PurpleForce Ko Support Karein.
Is Bar Hoga Quetta! Quettaa!! @thePSLt20 #WeTheGladiators #HBLPSLV pic.twitter.com/Qq1YVL3S3s
سماجی رابطے کی ویب سائٹ ٹویٹر پر ویڈیو میں دیکھا جا سکتا ہے کہ جہاں سابق مایہ ناز آسٹریلین آل راؤنڈر شین واٹسن نے اُردو میں قوم کے نام خصوصی پیغام بھیجا ہے۔
کوئٹہ گلیڈی ایٹرز کی نمائندگی کرنے والے شین واٹسن کا قومی زبان میں دیے گئے پیغام میں کہنا تھا کہ پاکستانیوں! شین واٹسن آ رہا ہے پاکستان۔
انہوں نے شائقین کرکٹ سے کوئٹہ گلیڈی ایٹرز کو سپورٹ کرنے کی درخواست کرتے ہوئے کہا کہ آپ سب پرپل فورس کو سپورٹ کریں، اس بار ہو گا کوئٹہ، کوئٹہ۔
یاد رہے کہ پاکستان کرکٹ بورڈ نے نئے سال کے پہلے دن پاکستان سپر لیگ 2020 کے شیڈول کا اعلان کردیا تھا اور ایونٹ کا پہلا میچ دفاعی چیمپیئن کوئٹہ گلیڈی ایٹرز اور اسلام آباد یونائیٹڈ کے درمیان 20فروری کو کھیلا جائے گا۔
پاکستان سپر لیگ کے اس ایونٹ کی خاص بات یہ ہے کہ اس مرتبہ ایونٹ کے تمام 34میچز پاکستان میں ہی کھیلے جائیں گے اور کراچی، لاہور، راولپنڈی اور ملتان ان میچز کی میزبانی کریں گے۔
واضح رہے کہ دنیا بھر کے سپر سٹارز پاکستان سپر لیگ میں شرکت اور پاکستان آنے کے حوالے سے پہلے ہی رضامندی ظاہر کر چکے ہیں۔
