لاہور: (دنیا نیوز) پاکستان اور جنوبی افریقہ پہلے ٹیسٹ میں کل آمنے سامنے ہو رہے ہیں، کراچی میں زور کا جوڑ پڑے گا، نیشنل اسٹیڈیم میں دونوں ٹیموں کی جم کر پریکٹس، سکیورٹی کے سخت انتظامات کئے گئے ہیں۔
شاہین بڑے معرکے کیلئے تیار، پاکستان اور جنوبی افریقہ کے درمیان پہلا ٹیسٹ میچ کل شیڈول ہے۔ ٹیسٹ سیریز کی ٹرافی کی رونمائی کر دی گئی۔ دونوں کپتانوں نے ٹرافی کے ہمراہ فوٹو سیشن کیا۔ بابراعظم اورکوئنٹن ڈی کوک سیریز جیتنے کیلئے پرامید ہیں۔
گذشتہ روز پاکستان کرکٹ بورڈ کی جانب سے قومی سکواڈ کا اعلان کیا گیا تھا، اوپنرز کے طور پر عابد علی اور عمران بٹ میدان میں اتریں گے۔ اظہر علی ، بابر اعظم ، فواد عالم اور سعود شکیل کو مڈل آرڈر بیٹسمین کے طور پر شامل کیا گیا ہے۔ آل راؤنڈرز میں فہیم اشرف اور محمد نواز جبکہ وکٹ کیپر محمد رضوان نائب کپتان ہیں۔ سرفراز کو بھی اسکواڈ کا حصہ بنایا گیا ہے۔ اسپنرز میں نعمان علی ، ساجد خان اور یاسر شاہ شامل ہیں۔ فاسٹ باؤلرز حارث رؤف ، حسن علی ، شاہین شاہ آفریدی اور تابش خان بھی جنوبی افریقہ کے خلاف اپنا حصہ ڈالیں گے۔
