لاہور:(ویب ڈیسک) پاکستان سپر لیگ (پی ایس ایل) کا ساتواں ایڈیشن کئی یادگار لمحات کی وجہ سے ابھی تک سوشل میڈیا کی زینت بنا ہوا ہے اور اسی تناظر میں فخر زمان کے ساتھ 2 لڑکوں کی سیلفی نے سوشل میڈیا پر ہنسی کا طوفان برپا کیا ہوا ہے جس کی تصویر قومی کرکٹر نے بھی شیئر کی ہے۔
واضح رہے کہ پی ایس ایل کا ساتواں ایڈیشن گزشتہ ماہ کی 274 تاریخ کو اختتام کو پہنچ گیا تھا، ایونٹ کے فیصلہ کن معرکے میں لاہور قلندرز نے دفاعی چیمپئن ملتان سلطانز کو شکست دیکر ٹرافی اپنے نام کی تھی۔
اس فائنل نے نہ صرف پاکستان بلکہ بیرون ملک بھی شائقین کرکٹ کو اپنے سحر میں جکڑ لیا اور دیار غیر سے بھی پاکستان کرکٹ کی تعریفوں کے پل باندھے جانے لگے۔
گزشتہ دنوں سے سوشل میڈیا پر ایک دلچسپ تصویر وائرل ہورہی ہے جسے دیکھ کر ہر کوئی ہنسنے پر مجبور ہوجاتا ہے اور اسی تصویر نے پاکستان کرکٹ ٹیم کے اوپننگ بیٹر فخر زمان کو بھی ہنسا دیا ہے۔
ہوا کچھ یوں کہ دو لڑکوں نے پی ایس ایل کے فائنل کے موقع پر قذافی سٹیڈیم میں ایک سیلفی بنائی جس میں دیکھا جاسکتا ہے کہ عقب میں لاہور قلندرز اور ملتان سلطانز کا میچ جاری ہے، ان دونوں لڑکوں نے اپنی سیلفی کے کیپشن میں لکھا کہ فخر زمان کے ساتھ سیلفی اور ساتھ ہی وہاں سے کافی فاصلے پر عقب میں کھڑے فیلڈر پر سرکل بھی کیا۔
It was nice to meet you https://t.co/vPxWvjqbmq
— Fakhar Zaman (@FakharZamanLive) March 3, 2022
یہ تصویر سوشل میڈیا پر وائرل ہوئی تو لاہور قلندرز کے بلے باز فخر زمان کی بھی نظر پڑی اور انہوں نے بھی اس سیلفی کو شیئر کرتے ہوئے ان دونوں لڑکوں کو مخاطب کرتے ہوئے لکھا کہ آپ لوگوں سے مل کر اچھا لگا ، ساتھ ہی قومی کرکٹر نے ہنسنے والا ایموجی بھی شیئر کیا۔
