روٹرڈیم: (ویب ڈیسک) نیدرلینڈز کے خلاف پہلے ون ڈے میچ میں پاکستان کے 2 کھلاڑیوں کا ڈیبیو ہوگیا۔
پاکستان اور نیدرلینڈز کے درمیان پہلے ون ڈے میچ میں آل راؤنڈر سلمان علی آغا اور فاسٹ باؤلر نسیم شاہ نے ڈیبیو کیا اور دونوں ہی کھلاڑی ون ڈے انٹرنیشنل میں ڈیبیو کرنے پرپرجوش ہیں۔
ڈیبیو کے حوالے سے گفتگو کرتے ہوئے نسیم شاہ نے کہا کہ پاکستان کی نمائندگی ایک خوبصورت احساس ہے، کرکٹ شروع کرتے ہی ہر کھلاڑی کا خواب ملک کی نمائندگی ہوتا ہے، پاکستان کی نمائندگی ایک خواب تھا جو آج پورا ہونے جارہا ہے، انٹرنیشنل پریشر کو ہینڈل کرنا مشکل ہوتا ہے لیکن کوشش کروں گا کہ بہترین کارکردگی کامظاہرہ کروں۔
.jpg)
نسیم شاہ نے کہا کہ ون ڈے ڈیبیو کرنے پر ایسا لگ رہا ہے کہ دوبارہ سے کیرئیر کا آغاز کررہا ہوں ، ٹیسٹ ڈیبیو کرتے وقت کی یادیں تازہ ہو رہی ہیں۔
انہوں نے مزید کہا کہ پاکستان میں کرکٹ رلاتی زیادہ اور ہنساتی کم ہے، پاکستان ٹیم میں کیسے آیا یہ لمبی کہانی ہے، قومی ٹیم میں جگہ بنانے تک کئی مشکلات پیش آتی ہیں۔
