لاہور: (ویب ڈیسک) قومی کرکٹ ٹیم کے سابق سپیڈ سٹار شعیب اختر سے شارجہ میں گزشتہ دنوں ملاقات کرنے والا 3 سالہ بچہ عمارت کی 14ویں منزل سے گر کر جاں بحق ہوگیا۔
راولپنڈی ایکسپریس نے بچے کی حادثاتی موت کی غیر ملکی ویب سائٹ کی خبر اپنے سوشل میڈیا اکاؤنٹ پر شیئر کی۔
اپنے ٹوئٹر اکاؤنٹ پر انہوں نے لکھا کہ شارجہ میں بک فیئر کے دوران یہ بچہ گزشتہ اتوار کو ہی میرے پاس دوڑ کر آیا تھا، اس کے گھر والوں نے اگلے دن شکریہ کی ویڈیو بھی بھیجی تھی۔
— Shoaib Akhtar (@shoaib100mph) November 17, 2022
سابق فاسٹ باؤلر نے بچے سے ملاقات اور پیار کے اظہارکی ویڈیو بھی اپنے اکاؤنٹ پر شیئر کی اور لکھا کہ اس خوبصورت بچے کے انتقال کا سن کر بہت دکھ ہوا۔
دوسری جانب دبئی کے خبر رساں ادارے میں شائع ہونے والی خبر کے مطابق شارجہ میں عمارت کی 14 ویں منزل سے گرنے والے پاکستانی بچے کے والدین سے پولیس غفلت کے شبے میں پوچھ گچھ کر رہی ہے۔
پولیس کی تحقیقات کے مطابق بچہ سو کر اٹھنے کے بعد ماں کو ڈھونڈتے ہوئے کھڑکی کے نیچے لگے بستر پر چڑھا اور کھڑکی سے نیچے گرا۔