کولمبو: (دنیا نیوز) کولمبو : پاکستان اور سری لنکا کے درمیان کولمبو ٹیسٹ کے دوسرے دن کا کھیل ختم کردیا گیا۔
بارش سے قبل پاکستان نے پہلی اننگز میں 2 وکٹ پر 178رنزبنا لیے تھے جس کے بعد قومی ٹیم کو سری لنکا کے خلاف پہلی اننگزمیں 12 رنزکی برتری حاصل ہو گئی ہے۔
پاکستان اور سری لنکا کے درمیان میچ کے دوسرے روز کا کھیل بارش کے باعث 10اوورز تک محدود رہا جس دوران عبداللہ شفیق 87 اور بابراعظم 28 رنز بنا کر ناٹ آؤٹ رہے۔
گزشتہ روز شان مسعود 51 اور امام الحق 6 رنز بنا کر آؤٹ ہوئے تھے، سری لنکا کی جانب سے اسیتھا فرنینڈو نے دونوں وکٹیں حاصل کی تھیں۔
سری لنکا کی پہلی اننگز
گزشتہ روز سری لنکا کے کپتان دیموتھ کرونا رتنے نے ٹاس جیت کر پہلے بیٹنگ کا فیصلہ کیا جو سود مند ثابت نہ ہوا اور پوری لنکن ٹیم 166 رنز پر ڈھیر ہو گئی تھی۔
سری لنکا کی جانب سے دھننجیا ڈی سلوا 57 اور دنیش چندیمل 34 رنز بنا کر نمایاں رہے جبکہ پاکستان کی جانب سے ابرار احمد نے 4 اور نسیم شاہ نے 3 کھلاڑیوں کو آؤٹ کیا، ایک وکٹ شاہین آفریدی کے حصے میں آئی اور دو کھلاڑیوں کو شان مسعود نے رن آؤٹ کیا۔
خیال رہے کہ دو ٹیسٹ میچوں کی سیریز میں پاکستان کو ایک صفر کی سبقت حاصل ہے، پاکستان نے گال میں کھیلے گئے پہلے ٹیسٹ میں سری لنکا کو 4 وکٹوں سے شکست دی تھی۔
