لاہور: (ویب ڈیسک) پاکستان کرکٹ ٹیم کے آل راؤنڈر شاداب خان نے افغانستان کے خلاف پہلے ون ڈے میں شاندار کیچ پکڑنے کے بعد بظاہر ایک بار پھر کپتان بابر اعظم کے نام دلچسپ پیغام جاری کیا ہے۔
منگل کو پاکستان اور افغانستان کے درمیان ہونے والے پہلے ایک روزہ میچ میں قومی ٹیم نے افغانستان کو 142 رنز سے شکست دے دی۔
افغانستان کی بیٹنگ کے دوران اننگز کے چوتھے اوور میں نسیم شاہ کی گیند پر شاداب نے افغان بیٹر حشمت اللہ کا ایک شاندار کیچ پکڑا۔ جس کی تعریفیں سوشل میڈیا پر بھی کی جارہی ہیں۔
تاہم میچ جیتنے کے بعد شاداب خان نے ٹوئٹر (ایکس) پر کیچ کی ویڈیو پوسٹ کرتے ہوئے بظاہر کپتان بابر اعظم کے نام پیغام جاری کرتے ہوئے لکھا کہ بڈھا نہیں ہوا ابھی میں ۔
— Shadab Khan (@76Shadabkhan) August 22, 2023
شاداب نے یہ بیان کیوں جاری کیا؟
دراصل مینز ٹی ٹوئنٹی ورلڈکپ 2021 کے وارم اپ میچ میں ویسٹ انڈیز کے خلاف ایک موقع پر جب شاداب خان سے رن آؤٹ چھوٹ گیا تھا جس پر کپتان بابر اعظم نے شاداب کو ’بڈھا‘ کہا تھا۔
تاہم 2021 میں ہی بنگلادیش کے خلاف 3 میچز کی ٹی ٹوئنٹی سیریز کے دوسرے میچ میں شاداب خان نے اپنی ہی بولنگ پر شاندار کیچ پکڑکے کپتان بابر اعظم کے نام دلچسپ پیغام لکھا تھا۔
سوشل میڈیا پلیٹ فارمز پر نائب کپتان شاداب خان نے بنگلا دیش کے خلاف دوسرے ٹی ٹوئنٹی میچ کی تصویر شیئر کی تھی اور بابر اعظم کو مخاطب کرتے ہوئے لکھا تھا کہ میں ابھی بڈھا نہیں ہوا ۔
— Shadab Khan (@76Shadabkhan) November 20, 2021
