کراچی:(دنیا نیوز) آئی سی سی چیمپئنز ٹرافی میں قومی ٹیم کی مایوس کن کارکردگی سے شائقین کی طرح گورنر سندھ کامران ٹیسوری کا بھی دل ٹوٹ گیا۔
گورنر سندھ کامران ٹیسوری نے کہا کہ آئی ایم ایف کی قسط لینا آسان اور ٹیم کا چیمپئنز ٹرافی کے اگلے مرحلے میں جانا مشکل ہوگیا۔
گورنر سندھ کا کہنا تھا کہ قومی ٹیم کی بیٹنگ لائن لڑکھڑائی، بالر کپکپائے، یہ دیکھ کر سارا مزہ کرکرا ہوگیا، چئیرمین پی سی بی نے جیسے سٹیڈیم بنائے ویسی ٹیم بھی بناتے۔
کامران ٹیسوری نے کہا کہ بہترین صلاحیتوں کے حامل بلےبازوں اور جان لڑانے والے فیلڈز کی ضرورت ہے، ایک بار اعلیٰ ترین معیار اپنا کر ٹیم بنالی تو شائقین کبھی مایوس نہیں ہوں گے۔
گورنر سندھ کامران ٹیسوری کا مزید کہنا تھا کہ اگر ٹیم میچ جیت جاتی تو ایک کروڑ روپے انعام دیتا۔
خیال رہے کہ دبئی سٹیڈیم میں کھیلےگئے چیمپئنز ٹرافی کے اہم میچ میں پاکستان کی پوری ٹیم 49 اعشاریہ 4 اوورز میں 241 رنز بنا کر آؤٹ ہوگئی، جواب میں 242 رنز کا ہدف بھارت نے 43 اوور میں 4 وکٹ کے نقصان پر پورا کرلیا، اس سے قبل پاکستان نیوزی لینڈ کے خلاف بھی اپنا افتتاحی میچ ہار چکا ہے۔
