لاہور: (ویب ڈیسک) پاکستان سپر لیگ (پی ایس ایل) 10 کے 19ویں میچ میں اسلام آباد یونائیٹڈ کے خلاف شاندار بولنگ کرتے ہوئے لاہور قلندرز کے فاسٹ بولرز شاہین آفریدی اور حارث رؤف نے ٹی 20 کرکٹ میں اہم سنگ میل عبور کر لیا۔
شاہین آفریدی اور حارث رؤف دونوں نے ٹی 20 کرکٹ میں اپنی 300، 300 وکٹیں مکمل کر لی ہیں، شاہین آفریدی نے کیریئر کے 216 ویں اور حارث رؤف نے 228 ویں میچ میں 300 وکٹیں مکمل کی۔
شاہین آفریدی ٹی 20 کرکٹ میں 300 وکٹیں مکمل کرنے والے تیز ترین پاکستانی بولر بن گئے، شاہین آفریدی نے 216 میچز میں یہ کارنامہ انجام دیا جبکہ 228 میچز میں 300 وکٹیں مکمل کر کے حارث رؤف دوسرے تیز ترین پاکستانی بولر بنے۔
اس سے قبل محمد عامر اور وہاب ریاض کے پاس مشترکہ طور پر یہ اعزاز تھا، وہاب ریاض اور محمد عامر نے 256، 256 اننگز میں یہ سنگ میل عبور کیا تھا، شاہین آفریدی ٹی 20 کرکٹ میں 300 وکٹیں لینے والے دنیا کے چوتھے تیز ترین بولر بھی ہیں۔
