دبئی: (دنیا نیوز) انٹرنیشنل کرکٹ کونسل (آئی سی سی) نے تازہ ترین ٹی 20 پلیئرز رینکنگ جاری کر دی ہے جس میں پاکستان کے بابر اعظم اور محمد رضوان کو تنزلی کا سامنا کرنا پڑا ہے۔
آسٹریلیا کے ٹریوس ہیڈ بدستور ٹی 20 بلے بازوں کی رینکنگ میں سرفہرست ہیں جبکہ بھارت کے یشوی جیسوال ایک درجہ بہتری کے بعد نویں نمبر پر آ گئے ہیں، ویسٹ انڈیز کے شائے ہوپ نے 4 درجے ترقی حاصل کی اور 10 ویں نمبر پر پہنچ گئے۔
دوسری جانب پاکستان کے بابر اعظم ایک درجہ نیچے آ کر 13ویں نمبر پر چلے گئے ہیں جبکہ محمد رضوان بھی ایک درجہ تنزلی کے بعد 14ویں پوزیشن پر آ گئے ہیں، بنگلہ دیش کے تنزید حسن نے 18 درجے بہتری کے بعد 37ویں پوزیشن حاصل کی ہے۔
بولرز کی فہرست میں نیوزی لینڈ کے جیکب ڈفی بدستور سرفہرست ہیں، بنگلہ دیش کے مستفیض الرحمان نے 17 درجے ترقی کرتے ہوئے 9ویں پوزیشن حاصل کی، جبکہ بھارت کے ارشدیپ سنگھ ایک درجہ بہتری کے ساتھ 10ویں نمبر پر آ گئے ہیں۔
آل راؤنڈرز کی فہرست میں بھارت کے ہاردک پانڈیا پہلی پوزیشن پر براجمان ہیں، ویسٹ انڈیز کے روسٹن چیز نے 7 درجے بہتری کے بعد دوسری پوزیشن حاصل کر لی ہے۔
