کنگسٹن: (دنیا نیوز) آسٹریلوی بیٹر ٹم ڈیوڈ کی دھواں دھار بیٹنگ کے باعث آسٹریلیا نے ویسٹ انڈیز کو 6 وکٹوں سے شکست دے دی۔
دورہ ویسٹ انڈیز کے دوران تیسرے ٹی 20 میچ میں ٹم ڈیوڈ نے آسٹریلیا کی جانب سے ٹی 20 فارمیٹ میں تیز ترین نصف سنچری اور تیز ترین سنچری کا ریکارڈ بنایا۔
آسٹریلیا نے تیسرے ٹی 20 میچ میں 214 رنز کا ہدف 23 گیندیں پہلے حاصل کر لیا، ویسٹ انڈیز نے پہلے بیٹنگ کرتے ہوئے 4 وکٹوں کے نقصان پر 214 رنز بنائے تھے، شائے ہوپ نے 57 گیندوں پر 102 رنز بنائے۔
ہدف کے تعاقب کے دوران میچ میں ٹم ڈیوڈ نے 16 گیندوں پر نصف سنچری بنائی، اس سے قبل مارکس سٹوئنس کا 17 گیندوں کا ریکارڈ تھا، بعدازاں ٹم ڈیوڈ نے 37 گیندوں پر سنچری مکمل کی، اس سے قبل جوش انگلس کا 43 گیندوں کا ریکارڈ تھا۔
آسٹریلیا نے یہ ہدف 16.1 اوورز میں 4 وکٹوں کے نقصان پر پورا کیا، ٹم ڈیوڈ 37 گیندوں پر 102 رنز بنا کر ناٹ آؤٹ رہے، کیریئر کی پہلی ٹی 20 سنچری بنانے والے ٹِم ڈیوڈ مین آف دی میچ بھی قرار پائے۔
واضح رہے کہ آسٹریلیا نے 5 ٹی 20 میچز کی سیریز میں تین صفر کی فیصلہ کن برتری حاصل کر لی ہے۔
