لندن: (ویب ڈیسک) بھارت کے فاسٹ بولر محمد سراج نے انگلینڈ کے خلاف پانچویں اور آخری ٹیسٹ کے دوسرے دن شاندار کارکردگی کا مظاہرہ کرتے ہوئے بین الاقوامی کرکٹ میں ایک بڑا سنگ میل عبور کر لیا۔
محمد سراج نے نہ صرف انگلینڈ کی بیٹنگ لائن کو جھنجھوڑ کر رکھ دیا بلکہ بھارت کے عظیم بلے باز سچن ٹنڈولکر کو وکٹوں کے معاملے میں بھی پیچھے چھوڑ دیا۔
دوسرے دن کے کھیل میں جب بھارت کی پوری ٹیم صرف 224 رنز پر ڈھیر ہوگئی تو سراج نے پرسدھ کرشنا کے ساتھ مل کر انگلینڈ پر واپس دباؤ ڈالا۔
دونوں بولرز نے 4،4 وکٹیں حاصل کیں اور انگلینڈ کی ٹیم کو 247 رنز پر آؤٹ کر دیا، سراج نے اولی پوپ، جو روٹ، ہیری بروک اور جیمی سمتھ جیسے اہم کھلاڑیوں کو آؤٹ کیا۔
اس شاندار سپیل کے بعد سراج کے ٹیسٹ وکٹوں کی تعداد 118 ہو گئی ہے جبکہ وہ ون ڈے میں 71 اور ٹی 20 میں 14 وکٹیں لے چکے ہیں، یوں محمد سراج کی بین الاقوامی وکٹوں کی مجموعی تعداد 203 ہو گئی ہے جو سچن ٹنڈولکر کی 201 وکٹوں سے زیادہ ہے۔
یہ سراج کا انگلینڈ میں چھٹا موقع تھا جب انہوں نے کسی ایک اننگز میں چار وکٹیں حاصل کیں، اس طرح انہوں نے جسپریت بمراہ کا پانچ چار وکٹوں والے سپیل کا ریکارڈ بھی توڑ دیا۔
ایشیائی بولرز میں صرف پاکستان کے سابق فاسٹ بولر وقار یونس نے انگلینڈ میں چھ بار چار یا اس سے زائد وکٹیں حاصل کی ہیں اور مجموعی طور پر 45 وکٹیں اپنے نام کیں۔
