لاہور: (دنیا نیوز) پاکستان کرکٹ بورڈ (پی سی بی) نے خواتین کرکٹرز کے لیے سینٹرل کنٹریکٹ 26-2025 کا اعلان کر دیا۔
سینٹرل کنٹریکٹ میں کھلاڑیوں کو 5 کیٹیگریز میں تقسیم کیا گیا ہے اور تمام کیٹیگریز میں کھلاڑیوں کے معاوضوں میں 50 فیصد اضافہ کیا گیا ہے۔
آئی سی سی ٹی 20 رینکنگز کی نمبر ون بولر سعدیہ اقبال کو کیٹیگری "اے" میں شامل کیا گیا ہے، ان کے ساتھ فاطمہ ثنا، منیبہ علی اور سدرہ امین بھی کیٹیگری اے میں جگہ بنانے میں کامیاب رہی ہیں۔
کیٹیگری "بی" میں عالیہ ریاض، ڈیانا بیگ اور نشرا سندھو کو شامل کیا گیا ہے جبکہ کیٹیگری "سی" کا واحد کنٹریکٹ رمین شمیم کو دیا گیا ہے۔
کیٹیگری "ڈی" میں 10 کھلاڑی شامل ہیں جن میں گل فیروزہ، نجیہ علوی، ناتالیہ پرویز، عمائمہ سہیل، صدف شمس، سدرہ نواز، عروب شاہ، طوبیٰ حسن، ام ہانی اور وحیدہ اختر کے نام شامل ہیں۔
پی سی بی نے اس بار ابھرتی ہوئی خواتین کرکٹرز کے لیے "ایمرجنگ کیٹیگری" بھی متعارف کرائی ہے جس میں نوجوان کھلاڑی ایمان فاطمہ اور شوال ذوالفقار کو کنٹریکٹ دیا گیا ہے۔
