دہلی: (دنیا نیوز) بھارتی کرکٹ بورڈ (بی سی سی آئی) کو ایشیا کپ 2025 کی فکر ستانے لگی، بھارتی بورڈ کیلئے ٹیم سلیکشن سر درد بن گئی ہے۔
بھارتی میڈیا کے مطابق کرکٹ بورڈ کے سلیکٹرز اور مینجمنٹ نے ایشیا کپ کی ٹیم کے لیے سوچ بچار شروع کردی اور ٹورنامنٹ کے لیے بھارتی سکواڈ کا اعلان 19 یا 20 اگست کو ہو سکتا ہے۔
بھارتی میڈیا کا کہنا ہے کہ ٹیم کے اعلان سے قبل تمام کرکٹرز کی فٹنس رپورٹ حاصل کرنے کا فیصلہ کیا گیا ہے، ایشیا کپ کے لیے کئی کرکٹرز کو زیر غور نہ لانے کا امکان ہے۔
میڈیا رپورٹس کے مطابق یشسوی جیسوال، سئی سدھرسن اور کے ایل راہول ایشیا کپ مس کر سکتے ہیں، ابھیشیک شرما اور سنجو سیمسن کی ٹیم میں شمولیت یقینی ہے جبکہ شبمن گل کے حوالے سے فیصلہ نہیں کیا گیا۔
شبمن گل کی فارم کی وجہ سے انہیں ٹی 20 سکواڈ میں شامل کیے جانے کا امکان ہے جبکہ فاسٹ بولر جسپریت بمرا کی شمولیت فٹنس سے مشروط ہے، ٹاپ آرڈر میں تسلسل کے ساتھ پرفارم کرنے والے کھلاڑیوں کی دستیابی نے سلیکشن کو مشکل بنا دیا ہے۔
بھارتی سلیکٹرز ایشیا کپ کے لیے مضبوط ترین سکواڈ تشکیل دینا چاہتے ہیں، ایشیا کپ 9 ستمبر سے متحدہ عرب امارات میں شروع ہو گا اور بھارت، پاکستان، عمان اور یو اے ای گروپ اے میں شامل ہیں۔
