دبئی :(دنیا نیوز) پاکستان نے ایشیا کپ میں عمان سے میچ جیت کر فاتحانہ آغاز کیا اورحریف ٹیم کو بآسانی93 رنز سے ہرا دیا۔
پاکستان نے مقررہ 20اوورز میں 7وکٹوں کے نقصان پر 160رنز بنائے اور حریف ٹیم کو 161 رنز کا ہدف دیا، پاکستان کی جانب سے محمد حارث 66رنز بنا کر ٹاپ سکورر رہے۔
اِسی طرح صاحبزادہ فرحان نے 29اور محمد نواز نے 19رنز بنائے، جب کہ حسن نواز نے 9اور فہیم اشرف نے 8رنز بنائے ، کپتان سلمان علی آغا اور صائم ایوب بغیر کوئی رن بنائے آؤٹ ہوئے،عمان کی جانب سے شاہ فیصل اور عامر کریم نے 3،3 وکٹیں اپنے نام کیں۔
ہدف کے تعاقب میں عمان کی ٹیم کی بیٹنگ ابتدا ہی میں دباؤ میں نظر آئی، عمان کا کوئی کھلاڑی بھی کریز پر جم کر نہ کھیل سکا اور یوں پوری ٹیم 67رنز پر ڈھیر ہو گئی۔
عمان کی جانب سے حماد مرزا27اور عامر کلیم 13رنز بنا کر نمایاں رہے جب کہ محمد ندیم 3 ونائک شگلا 2 رنز بنا کر آؤٹ ہوئے اور جتندر سنگھ، سفیان محمود ، شاہ فیصل ایک، ایک رنز بنا کر چلتے بنے۔
دوسری جانب قومی باؤلر صائم ایوب ، سفیان مقیم اور فہیم اشرف نے بہترین کارکردگی کا مظاہرہ کرتے ہوئے دو، دو کھلاڑیوں کو پویلین کی راہ دکھائی۔
یاد رہے کہ پاکستان اپنے دوسرے مقابلے میں روایتی حریف بھارت کے خلاف 14 ستمبر کو دبئی کے میدان میں مدِمقابل آئے گا۔
