جوہانسبرگ: (دنیا نیوز) جنوبی افریقہ کے بیٹر کونئنٹن ڈی کاک نے ون ڈے کرکٹ سے ریٹائرمنٹ واپس لے لی۔
کونئنٹن ڈی کاک کو پاکستان کے خلاف ٹی 20 اور ون ڈے سکواڈ میں شامل کر لیا گیا، جنوبی افریقہ کے ٹیسٹ، ون ڈے اور ٹی 20 سکواڈز کا اعلان کر دیا گیا ہے۔
کرکٹ جنوبی افریقہ کے مطابق ٹیسٹ کپتان ٹیمبا باووما سیریز سے باہر ہو گئے ہیں، وہ پنڈلی میں انجری کے باعث سیریز سے باہر ہوئے ہیں، ایڈن مارکرم ٹیم کی قیادت کریں گے۔
کیشو مہاراج صرف دوسرے ٹیسٹ کے لیے سکواڈ کا حصہ ہیں، ان کا ری ہیب مکمل ہونا باقی ہے جبکہ میتھیو بریٹزکے ون ڈے میں عبوری کپتان ہوں گے، دورے میں جنوبی افریقی ٹیم 2 ٹیسٹ، 3 ون ڈے اور 3 ٹی 20 میچز کی سیریز کھیلے گی۔
جنوبی افریقہ ٹیسٹ ٹیم 7 اکتوبر کو پاکستان کے لیے روانہ ہو گی، روانگی سے قبل ٹیسٹ سکواڈ 5 اور 6 اکتوبر کو پریٹوریا میں ٹریننگ کرے گا۔
