دبئی: (دنیا نیوز) پاک بھارت میچ میں بھارتی تماشائیوں نے حارث رؤف کی ٹرولنگ کی۔
پاکستانی فاسٹ بولر حارث رؤف نے چھ صفرکا اشارہ کرکے جوابی وار کیا، بھارتیوں کو معرکہ حق کی یاد دلا دی، وزیر دفاع خواجہ آصف نے حارث رؤف کو شاباش دی۔
وزیر دفاع خواجہ آصف نے ایکس پر پیغام میں کہا کرکٹ میچ ہوتے رہیں گے، چھ صفر قیامت تک بھارت کو نہیں بھولے گا، دنیا بھی اس کو یاد رکھے گی۔
واضح رہے کہ ایشیا کپ کے سپر فور مرحلے کے ہائی وولٹیج مقابلے میں بھارت نے پاکستان کو 6 وکٹوں سے شکست دیدی تھی، پاکستان کی جانب سے دیا گیا 172 رنز کا ہدف بھارت نے 4 وکٹوں کے نقصان پر حاصل کر لیا، بھارتی بیٹر ابھیشیک شرما نے 39 گیندوں پر 74 رنز کی جارحانہ اننگ کھیلی، ان کی اننگ میں 5 چھکے اور 6 چوکے شامل تھے۔
بھارت کے نائب کپتان شبمن گل نے 28 گیندوں پر8 چوکوں کی مدد سے 47 رنز سکور کئے تھے جبکہ کپتان سوریا کمار یادو بغیر کھاتہ کھولے ہی حارث رؤف کی گیند پر ابرار احمد ہاتھوں کیچ آؤٹ ہو گئے۔
بھارتی وکٹ کیپر بلے باز سنجو سمسن بھی حارث رؤف کا شکار بنے اور 17 گیندوں پر 13 رنز بنا کر پویلین لوٹ گئے جبکہ تلک ورما نے 30 اور ہاردک پانڈیا نے 7 رنز کی ناٹ آؤٹ اننگ کھیلی تھی۔
