دبئی: (ویب ڈیسک) قومی کرکٹ ٹیم کے سابق کپتان اور سوئنگ کے سلطان وسیم اکرم نے ایشیا کپ 2025 کے سپر 4 مرحلے میں پاکستان بھارت میچ سے قبل شاہین شاہ آفریدی کو اہم مشورے دے ڈالے۔
وسیم اکرم نے شاہین آفریدی کو کہا کہ بھارتی اوپنر اور نائب کپتان شبمن گل کے خلاف سمارٹ باؤلنگ کرنا ہوگی اور مخصوص حکمت علی اپنانے کی ضرورت ہے۔
انہوں نے بھارت اور عمان کے میچ کا حوالہ دیتے ہوئے کہا کہ گزشتہ میچ میں عمانی فاسٹ باؤلر شاہ فیصل نے شبمن گل کو ایک لیٹ سوئنگ فل لینتھ گیند پر آؤٹ کیا اور میں چاہتا ہوں کہ شاہین آفریدی بھی یہی کرے، دنیا کو معلوم ہو چکا ہے کہ شاہین آفریدی ابتدا میں یارکرز پھینکتے ہیں، اس لیے انہیں اب پلان بی کی ضرورت ہے۔
ان کا کہنا تھا کہ اگر شاہین آفریدی مسلسل یارکرز پر انحصار کریں گے تو ان کی پریشانی میں اضافہ ہو سکتا ہے۔
سوئنگ کے سلطان نے مزید کہا کہ ایک یارکر تو ٹھیک ہے لیکن لگاتار ٹھیک نہیں، شاہین آفریدی کو دیکھا ہوگا کہ وہ ہر گیند پر وکٹ لینے کی کوشش میں خود پر دباؤ تو نہیں ڈال رہے، بہتر ہے کہ وہ لینتھ اور وارئٹی کے ساتھ باؤلنگ کریں۔
