دبئی: (دنیا نیوز) ٹی 20 ایشیا کپ سپر فور مرحلے کے چوتھے میچ میں بھارت نے بنگلادیش کو 41 رنز سے شکست دیکر فائنل کیلئے کوالیفائی کرلیا۔
بھارت کی جانب سے ملنے والے 168 رنز کے ہدف کے تعاقب میں بنگلادیش کی پوری ٹیم آخری اوور میں 127 رنز بناکر پویلین لوٹ گئی۔
بنگلا دیش کی جانب سے اوپنر بیٹر سیف حسن 51 گیندوں پر 69 رنز بنا کر نمایاں رہے، پرویز حسین نے 21 رنز سکور کیے جبکہ باقی کوئی کھلاڑی ڈبل فگر میں بھی داخل نہ ہو سکا۔
بھارت کی جانب سے کلدیپ یادو نے تین، جسپریت بمراہ اور ورون چکرورتھی نے 2،2 جبکہ اکشر پٹیل اور تلک ورما نے ایک ایک وکٹ حاصل کی۔
— AsianCricketCouncil (@ACCMedia1) September 24, 2025
قبل ازیں دبئی انٹرنیشنل کرکٹ سٹیڈیم میں ہونیوالے ایونٹ کے سپرفور مرحلے کے اہم میچ میں بنگلادیش کرکٹ ٹیم کے کپتان ذاکر علی نے ٹاس جیت کر بھارتی کرکٹ ٹیم کے کپتان کو پہلے بیٹنگ کی دعوت دی ۔
پہلے بیٹنگ کرتے ہوئے بھارت نے مقررہ 20 اوورز میں 6 وکٹوں کے نقصان پر 168 رنز بنائے، بھارت کی جانب سے ابھیشیک شرما 75 رنز بناکر نمایاں رہے، ہاردک پانڈیا نے 38، شبمن گل نے 29 رنز بنائے۔
بنگلادیش کی جانب سے ارشاد حسین نے 2، مستفیض الرحمان، محمد سیف الدین اور تنظیم حسن نے ایک ایک وکٹ حاصل کی۔
بھارت نے ایشیا کپ کے فائنل کے لیے کوالیفائی کر لیا ہے، پاکستان کو فائنل میں پہنچنے کے لیے بنگلا دیش کو شکست دینا ہو گی، ایشیا کپ کا فائنل میچ 28 ستمبر کو کھیلا جائے گا۔
