دبئی: (دنیا نیوز) پاکستانی کرکٹ ٹیم کے ہیڈ کوچ مائیک ہیسن نے ٹی 20 ایشیا کپ کے فائنل میں پاک بھارت ٹاکرے سے پہلے کرکٹرز کے لیے خصوصی پیغام جاری کر دیا۔
مائیک ہیسن نے ٹیم کو پیغام دیا ہے کہ صرف کھیل پر توجہ دیں، دباؤ والے میچز میں جذبہ آنا فطری بات ہے مگر ہمیں اپنی توجہ کھیل پر مرکوز رکھنی ہوگی، بھارت کے خلاف پہلے میچ میں پاکستان کی کارکردگی کمزور تھی مگر دوسرے میچ میں ٹیم نے بہتر فائٹ کی۔
ہیڈ کوچ نے جیت کے عزم کو ظاہر کرتے ہوئے کہا ہے کہ ہم نے پچھلے میچ میں بھارت کو کافی دیر تک دباؤ میں رکھا مگر میچ ختم کرنے کے لیے ہمیں یہ دباؤ زیادہ دیر تک برقرار رکھنا ہو گا اور یہی ہماری اصل آزمائش ہے۔
اُنہوں نے مزید کہا ہے کہ ٹیم نے مسلسل کامیابیوں کے بعد اعتماد حاصل کیا ہے اور اب کھلاڑی اس تاریخی موقع سے فائدہ اٹھانے کے لیے پرعزم ہیں۔
واضح رہے کہ بھارت اب تک 8 بار ایشیا کپ ٹرافی جیت چکا ہے جبکہ پاکستان صرف 2 بار جیت سکا ہے، پاکستان آخری بار 2012 میں چیمپئن بنا تھا، ایشیا کپ کی 41 سالہ تاریخ میں پاکستان اور بھارت پہلی بار فائنل کھیلیں گے جو اتوار کو دبئی انٹرنیشنل کرکٹ سٹیڈیم میں کھیلا جائے گا۔
