رائیونڈ: (ویب ڈیسک) لاہور رائیونڈ کے علاقہ میں سفاک ملزم نے شادی کے تنازعہ پر ماں اور بہن کو گلا دبا کر قتل کردیا، ملزم ہمشیرہ کی شادی رشتہ داروں میں کرنا چاہتا تھا جبکہ ہمشیرہ کا کہیں اور ارادہ تھا، ماں بھی ہمشیرہ کے ساتھ تھی۔
پولیس ذرائع کے مطابق واقعے کی اطلاعات ملتے ہی پولیس کی بھاری نفری جائے وقوعہ پر پہنچی اور علاقہ مکینوں کی نشاندہی پر ملزم کو گرفتار کر لیا، ملزم کا نام کامران بتایا گیا ہے جبکہ کہ قتل ہونے والی خواتین کی شناخت ملزم کی والدہ اصغری بی بی اور بہن ماہ نور کے نام سے ہوئی ہے۔
پولیس حکام کے مطابق ملزم کامران نے ابتدائی تفتیش میں انکشاف کیا ہے کہ وہ اپنی ہمشیرہ ماہ نور کی شادی رشتہ داروں میں کرنا چاہتا تھا جس پر اس کی بہن نے انکار کر دیا، ہمشیرہ کہیں اور شادی کرنا چاہتی تھی۔
ملزم کا کہنا ہے کہ اس کی ماں بھی ہمشیرہ کے ساتھ تھی اور یہی بات تنازعے کی وجہ بنی جس پر ملزم نے اشتعال میں آکر دونوں کا گلہ دبا کر قتل کر ڈالا۔ پولیس نے ابتدائی تحقیق کے بعد جائے وقوعہ سے شواہد اکٹھے کر لئے ہیں جبکہ ملزم سے مزید تفتیش کا عمل جاری ہے۔
