لاہور : (دنیا نیوز ) دہشت گردی کے خدشات کے پیش نظر سی ٹی ڈی پنجاب کی بڑی کارروائی، خفیہ آپریشن کے دوران لاہور سمیت تین شہروں سے 12 دہشت گردگرفتار کرلیے گئے ۔
کاؤنٹر ٹیررزم ڈیپارٹمنٹ (سی ٹی ڈی ) پنجاب کے مطابق دہشت گردوں کی نشاندہی 61 مشتبہ افراد سے تفتیش کے دوران کی گئی ، لاہور سے 3 دہشت گردوں کو حساس علاقے کے قریب سے گرفتار کیا گیا ، دہشت گردوں کا تعلق القاعدہ اور ٹی ٹی پی سے ہے۔
سی ٹی ڈی حکام کے مطابق دہشت گردوں سے بارودی مواد، خودکش جیکٹ بنانے کا سامان بھی برآمد کیا گیا ہے ، دہشت گردوں کے نیٹ ورک حساس اضلاع میں تخریب کاری کرنا چاہتے تھے۔
حکام کے مطابق گرفتار دہشت گردوں کے خلاف مقدمات درج کرکے تفتیش جاری ہے ۔
سی ٹی ڈی حکام کا مزید کہنا تھا کہ رواں ہفتے 797 کومبنگ و سرچ آپریشن کیے گئے ، ان آپریشنز کے دوران 159 مشتبہ افراد کو گرفتار کیا گیا ہے ۔
حکام کا کہنا ہے کہ ریاست دشمن عناصر کو کیفر کردار تک پہنچانے میں کوئی کسر نہیں چھوڑی جائے گی ۔
