علی پور: (دنیا نیوز) ظالم شوہر نے بیوی سمیت 7 بچوں کو موت کے گھاٹ اتار دیا۔
پولیس حکام کے مطابق مظفر گڑھ کی تحصیل علی پور میں دل دہلا دینے والا واقعہ پیش آیا جہاں سجاد نامی شخص نے اہلیہ سمیت اپنے سات بچوں کو تیز دھار آلے سے قتل کر دیا، واقعے کے بعد قاتل نے خود کو پولیس کے حوالے کر دیا۔
ذرائع کا کہنا ہے کہ قاتل نے گھریلو ناچاقی پر اہلخانہ کو قتل کیا، سجاد درزی کا کام کرتا ہے۔
قتل ہونے والوں میں سجاد کی 40 سالہ بیوی کوثر مائی، 8 سالہ انسہ، 7 سالہ کنزہ، 6 سالہ رمشہ، 4 سالہ مہناز، 2 سالہ انس، 3 سالہ سبحان اور 6 ماہ کی منزہ شامل ہیں
ریسکیو حکام کے مطابق قتل ہونے والے تمام افراد کی میتیں سول ہسپتال علی پور منتقل کر دی گئی ہیں۔
پولیس نے جائے وقوعہ سے شواہد اکٹھے کر کے تحقیقات کا آغاز کر دیا ہے۔
یاد رہے کہ اس سے قبل 2 مارچ کو لاہور کے علاقے سبزہ زار کی حدود میں گھریلو ناچاقی پر شوہر نے بیوی کو قتل کر دیا تھا جسے بعدازاں پولیس نے گرفتار کر لیا۔
وزیراعلیٰ کا نوٹس
وزیراعلیٰ پنجاب مریم نواز نے واقعے کا نوٹس لے کر آئی جی پنجاب سے رپورٹ طلب کر لی۔
مریم نواز نے ماں اور سات بچوں کے قتل پر گہرے دکھ کا اظہار کرتے ہوئے ملزم کو کیفر کردار تک پہنچانے کا حکم دے دیا۔
