لاہور: (دنیا نیوز) صوبائی دارالحکومت لاہور میں پولیس اور ڈاکوؤں کے درمیان فائرنگ کے تبادلے میں ایک ڈاکو ہلاک ہو گیا۔
پولیس کے مطابق لاہور کے علاقے سگیاں پل کے قریب ڈاکوؤں اور پولیس کے درمیان فائرنگ کا تبادلہ ہوا ، فائرنگ کے نتیجے میں ایک ملزم ہلاک ہو گیا، ڈاکو عدیل مسیح لاہور سمیت پنجاب کے دیگر اضلاع میں ڈکیتی کی وارداتیں کر چکا تھا۔
پولیس کی جانب سے بتایا گیا کہ عدیل مسیح کو نشاندہی پر لے جایا جا رہا تھا کہ ساتھیوں نے فائرنگ کر دی، زخمی عدیل مسیح کو مقامی ہسپتال منتقل کیا جا رہا تھا کہ زخموں کی تاب نہ لاتے ہوئے راستے میں ہی دم توڑ گیا۔
سی آئی اے کے مطابق عدیل مسیح قصور کا رہائشی اور اشتہاری ملزم بھی تھا، ملزم فیصل آباد، قصور، اوکاڑہ اور دیگر اضلاع میں پولیس کو مطلوب تھا، فائرنگ کر کے اپنے ساتھی کو ہلاک کرنے والے ملزمان کی تلاش میں سرچ آپریشن کیے جا رہے ہیں۔
