کراچی: (دنیا نیوز) محکمہ موسمیات کے نزدیک فائرنگ سے شہری جاں بحق ہوگیا۔
واقعے کی سی سی ٹی وی فوٹیج میں دو موٹرسائیکل سوار ملزموں کو مقتول فرحان پر گولیاں برساتے دیکھا جا سکتا ہے۔
فوٹیج میں دیکھا جا سکتا ہے کہ مقتول فرحان جیسے ہی اپنی گاڑی سے اترا تو دو حملہ آور موٹرسائیکل پر پہنچے، فرحان نے ملزموں کو دیکھ کر پستول چھیننے کی کوشش کی۔
مقتول فرحان ایک حملہ آور سے گتھم گتھا ہوگیا، مسلح ملزم نے سڑک پر گرے مقتول فرحان پر گولیاں چلائیں، فائرنگ کے بعد ملزم موٹرسائیکل پر اپنے ساتھی کے ہمراہ فرار ہوگیا۔
فوٹیج میں دیکھا جا سکتا ہے کہ ملزم کے فرار ہونے کے بعد مقتول کے ساتھ گاڑی میں بیٹھا دوسرا شخص اتر کر باہر آیا۔
سرعام ہونے والی قتل کی واردات کے بعد شہریوں کو جائے واقعہ پر جمع ہوتے دیکھا جا سکتا ہے، پولیس کا کہنا ہے کہ واقعے کی مختلف پہلوؤں سے تحقیقات جاری ہیں۔
