لاہور: (محمد اشفاق) سیشن کورٹ لاہور میں 8 سالہ بچی سے زیادتی کیس کی سماعت ہوئی، عدالت نے 8 سالہ بچی سے زیادتی کے ملزم کو سزائے موت کا حکم سنا دیا۔
ایڈیشنل سیشن جج ڈاکٹر ساجدہ احمد نے ملزم دلاور علی کو سزا کا حکم سنایا، درخواست میں موقف اپنایا گیا تھا کہ بچی کو اینٹیں ماری گئیں جس سے بچی کی بائیں آنکھ ضائع ہو گئی تھی۔
جج صاحبہ نے بچی کی آنکھ کا علاج سرکاری اخراجات پر کرنے کا حکم دے دیا، اسسٹنٹ ڈسٹرکٹ پبلک پراسیکیوٹر حمیرا اعجاز نے ملزم کے خلاف شہادتیں پیش کیں۔
تھانہ نشتر کالونی میں 2020 میں مقدمہ اینٹی ریپ ایکٹ کے تحت درج ہوا تھا، دوران سماعت پراسیکیوٹر نے کہا کہ ملزم کے خلاف تمام تر شواہد موجود ہیں، ملزم کے خلاف چودہ گواہ پیش کئے گئے۔
عدالت نے سرکاری گواہان کی گواہی کی روشنی میں سزا کا حکم سنایا۔
