کراچی :(ویب ڈیسک ) مصطفی عامر کیس میں ارمغان کے گھر پر چھاپہ مارنے والی پولیس ٹیم کے بیانات قلمبند کرنے کا فیصلہ کرلیا گیا۔
شہر قائد کے علاقے ڈیفنس میں اغوا کے بعد قتل ہونے والے مصطفی عامر کیس میں اہم پیشرفت سامنے آئی ہے، وفاقی تحقیقاتی ادارے ایف آئی اے نے سندھ پولیس کو خط لکھ دیا، ارمغان کے گھر پر چھاپہ مارنے والی پولیس ٹیم کے بیانات قلمبند کرنے کا فیصلہ کیا گیا ہے۔
مصطفی عامر قتل کیس میں ارمغان کی گرفتاری کے معاملے پر ایف آئی اے نے سندھ پولیس کو خط لکھ دیا، جس میں ارمغان کی گرفتاری کے حوالے سے وضاحت طلب کی گئی ہے۔
ذرائع نے بتایا کہ ایف آئی اے نے فیصلہ کیا ہے کہ ارمغان کے گھر پر چھاپہ مارنے والی پولیس ٹیم کے بیانات قلمبند کیے جائیں گے تاکہ معاملے کی گہرائی تک پہنچا جا سکے اور مقدمے کے تمام پہلوؤں کا جائزہ لیا جا سکے، اس سلسلے میں ایف آئی اے کی ٹیم جلد ہی ارمغان کے بنگلے کا دورہ کرے گی اور وہاں سے مزید شواہد جمع کرے گی۔
ایف آئی اے ذرائع کا مزید کہنا ہے کہ ارمغان اور اس سے منسلک افراد کا ڈیٹا بھی اکٹھا کیا جا رہا ہے تاکہ تحقیقات کو مزید مؤثر بنایا جا سکے، اس پیش رفت کے بعد کیس کی تحقیقات میں مزید نئے انکشافات کی توقع کی جا رہی ہے۔
