راجن پور: (ویب ڈیسک) پنجاب پولیس نے کچے کے علاقے میں ڈاکوؤں کے خلاف کارروائی کر کے دو مشتبہ افراد کو گرفتار کرلیا اور دیگر علاقوں میں آپریشن جاری ہے۔
پنجاب پولیس کے ترجمان نے بتایا کہ روجھان پولیس کی جانب سے راجن پور کچہ کے علاقے روجھان میں عمرانی گینگ اور لنڈ گینگ کے ڈاکوؤں کی گرفتاری کے لیے چک عمرانی میں کارروائی کی گئی۔
سرچ آپریشن چک عمرانی میں لنڈ اور عمرانی گینگ ان کے سہولت کاروں کی کمین گاہوں پر کیا گیا، پولیس کی پیش قدمی پر ڈاکو دریا کے راستے فرار ہوئے تاہم پولیس نے تعاقب جاری رکھا۔
پنجاب پولیس کے ترجمان کا کہنا تھا کہ آپریشن کے دوران دو مشتبہ افراد کو حراست میں لے لیا گیا ہے اور پولیس کی جانب سے ڈاکوؤں کی کمین گاہوں کو بھی نذر آتش کر دیا گیا۔
ترجمان نے بتایا کہ پولیس نے علاقے کو گھیرے میں لے لیا اور ڈاکوؤں کی تلاش جاری ہے۔
اس موقع پر ڈی پی او راجن پور نے کہا کہ کچے میں قیام امن تک راجن پور پولیس کا ہر کریمنل کے خلاف آپریشن جاری رہے گا۔
