کراچی: (دنیا نیوز) شہر قائد میں باپ نے نافرمان بیٹے کو قتل کر دیا۔
واقعہ اورنگی ٹاؤن کے علاقے راجہ تنویر کالونی میں پیش آیا جہاں پر خاندانی جھگڑے نے ہولناک رخ اختیار کر لیا، باپ نے مبینہ طور پر نافرمانی پر بیٹے کو بیلچے کے وار سے قتل کر دیا۔
واقعہ کی اطلاع پر فوری طور پر پولیس موقع پر پہنچ گئی اور ملزم کو گرفتار کر کے آلہ قتل برآمد کر لیا، پولیس حکام کے مطابق مقتول کی شناخت 21 سالہ علی خان کے نام سے ہوئی ہے، جس کی لاش کو قانونی کارروائی کے لئے ہسپتال منتقل کر دیا گیا۔
پولیس کا مزید کہنا ہے کہ مقتول علی خان اور اس کے والد عبدالغفار کے درمیان گھریلو تنازع چل رہا تھا اور ابتدائی تحقیقات سے پتہ چلتا ہے کہ واقعہ نافرمانی کے تناظر میں پیش آیا۔
پولیس کے مطابق ملزم نے طیش میں آ کر گھر میں موجود بیلچہ اٹھایا اور بیٹے پر جان لیوا وار کر دیئے۔
