لاہور: (دنیا نیوز) محمود بوٹی ناکہ پر گاڑی چیک کرنے پر کار سوار خاتون مشتعل ہو گئی، لیڈی پولیس اہلکار کا سر پھاڑ دیا۔
ترجمان پولیس کے مطابق ناکہ محمود بوٹی پر معمول کی چیکنگ کے دوران کار سوار خاتون نے جھگڑا شروع کر دیا، مشتعل خاتون نے ایسٹرن بائی پاس کی معمول کی ٹریفک کو گاڑی کھڑی کر کے بلاک کر دیا۔
پولیس ترجمان کے مطابق خاتون نے ناکہ پر موجود دیگر اہلکاروں کیساتھ بدتمیزی کی اور سنگین نتائج کی دھمکیاں دیں۔
ڈیوٹی پر موجود لیڈی پولیس اہلکار نے مشتعل خاتون کو گاڑی سائیڈ پر کرنے کا کہا، کار سوار خاتون نے طیش میں آکر میٹل کی بوتل لیڈی پولیس اہلکار کے سر میں دے ماری۔
ترجمان پولیس کے مطابق لیڈی پولیس اہلکار رباب سر پر چوٹ آنے سے زخمی ہوگئی، مشتعل خاتون سمیرا کو حراست میں لے کر تھانہ مناواں منتقل کر دیا گیا۔
ایس پی موبائلز نے کہا کہ قانونی کارروائی کے بعد مقدمہ درج کیا جائے گا، ناکہ جات پر پولیس اہلکار آپ کی حفاظت کیلئے 24/7 موجود ہوتے ہیں، شہر میں امن و امان قائم کرنے کیلئے شہری پولیس کا ساتھ دیں۔
