کراچی:(دنیا نیوز) سرکاری ملازم پر تشدد اور کار سرکار میں مداخلت کے مقدمے میں گرفتار وزیر بلدیات سندھ سعید غنی کے بھائی اور چیئرمین چنیسر ٹاؤن فرحان غنی کو راہداری ریمانڈ پر پولیس کے حوالے کر دیا گیا،فرحان غنی کو پیش سپیشل ڈیوٹی مجسٹریٹ کی عدالت میں پیش کیا گیا۔
پولیس نے بتایا کہ ملزمان کے خلاف مقدمہ انسداد دہشت گردی دفعات کے تحت فیروز آباد تھانے میں مقدمہ درج ہے، ملزمان کو کل انسداد دہشت گردی کی منتظم عدالت کے روبرو پیش کیا جائے گا۔
عدالت نے تفتیشی افسر کے بیان کی روشنی میں فرحان غنی کو ایک روز کے راہداری ریمانڈ پر پولیس کے حوالےکر دیا، قبل ازیں پولیس کی جانب سے فرحان غنی اور دیگر ملزمان کے بیانات قلمبند کیے گئے۔
خیال رہے کہ چیئرمین چنیسر ٹاؤن فرحان غنی اور دیگر کے خلاف فیروزآباد تھانے میں سرکاری ملازم کی مدعیت میں درج ہے، مقدمے میں انسداد دہشت گردی، اقدام قتل اور دیگر دفعات شامل ہیں اور گرفتار ملزمان میں فرحان غنی، قمر احمد خان، شکیل چانڈیو، سکندر اور روحان شامل ہیں۔
