لاہور: (دنیا نیوز) کاؤنٹر ٹیررازم ڈیپارٹمنٹ (سی ٹی ڈی) نے دہشت گردی کے خدشات کے پیش نظر پنجاب کے شہروں میں ایک ماہ میں 386 آئی بی اوز آپریشنز کرتے ہوئے 18 مبینہ دہشت گردوں کو حراست میں لے لیا۔
ترجمان سی ٹی ڈی پنجاب کے مطابق انٹیلی جنس بیسڈ کارروائیاں لاہور، منڈی بہاؤالدین ،خوشاب ،بہاولپور،ٹوبہ ٹیک سنگھ ، گوجرانوالہ ،نارووال ،پاک پتن، بھکر میں کی گئیں، گرفتار مبینہ دہشت گردوں میں انتہائی خطرناک دہشت گرد تنظیم کا اہم رکن بھی شامل ہے جو پنجاب کے ایک شہر میں دہشت گردی کی پلاننگ مکمل کر چکا تھا۔
ترجمان نے مزید بتایا کہ دہشت گردوں سے دھماکہ خیز مواد،ای آئی ڈی بم، 3 ڈیٹونیٹرز، 13 حفاظتی فیوز وائر، پمفلٹ، نقدی اور پرائما کارڈ برآمد کیے گئے ہیں، دہشت گردوں کی شناخت محمد کریم ،علی رضا ،محمد عزیز ، محمد علی ، ہاشم ، نورالامین ،سلیم ، صدام وغیرہ کے نام سے ہوئی ہے۔
حکام سی ٹی ڈی کا کہنا ہے کہ دہشت گرد مختلف مقامات پرکارروائی کرکےعوام میں خوف و ہراس پھیلانا چاہتے تھے، رواں ماہ میں 4601 کومبنگ آپریشنز کے دوران 320 مشتبہ افراد گرفتار کیے، کومبنگ آپریشنز میں 109892 افراد سے پوچھ گچھ کی گئی۔
سی ٹی ڈی کا کہنا ہے کہ سی ٹی ڈی محفوظ پنجاب کے ہدف پر عمل پیرا ہے، سی ٹی ڈی دہشت گردی کے ناسور کو جڑ سے اکھاڑ پھینکنے کے لیے پرعزم ہیں۔
