لاہور: (دنیا نیوز) پاکستان فلم انڈسٹری اور ڈراموں کی خوبرو اداکارہ ماہرہ خان کا کہنا ہے کہ پاکستان انٹرنیشنل ایئر لائن (پی آئی اے) کی بد انتظامی ناقابل معافی ہے۔
تفصیلات کے مطابق پی آئی اے کی بد قسمت پرواز پی کے 8303 میں اپنے خاندان کو کھو دینے والے زین پولانی کے بھائی کمیل پولانی نے حال ہی میں سماجی رابطے کی ویب سائٹ ٹویٹر پر ٹویٹ کیا جس میں انھوں نے اداروں کی کارکردگی کی نااہلی کے بارے بتایا۔
کمیل پولانی نے اپنے ٹوئٹ میں لکھا کہ زین پولانی کے دو بچوں کی نماز جنازہ اور تدفین ہو گئی ہے جب کہ ان کے ایک بچے کی لاش حکام کی نااہلی کے باعث 11 دن قبل کسی اور خاندان کے سپرد کر دی گئی تھی جسے اس خاندان نے دفنا بھی دیا۔
Zain Polani s 2 children s Janaza and Burial was done today, 1 body of child due to negligence of authorities was handed over to another family 11 days back and buried by that family. We demand strict investigation in this matter. @ImranKhanPTI @Official_PIA @murtazawahab1
— Kumail Polani (@KumailPolani) June 4, 2020
کمیل پولانی نے اپنے ٹویٹ میں وزیراعظم عمران خان، پی آئی اے اور سندھ حکومت کے ترجمان سینیٹر مرتضیٰ وہاب کو ٹیگ کرتے ہوئے مزید کہا کہ ہم اس معاملے پر سخت تحقیقات کا مطالبہ کرتے ہیں۔
دوسری طرف کمیل پولانی کے ٹوئٹ پر اداکارہ ماہرہ خان نے بھی اپنے ردعمل کا اظہار کیا۔
@Official_PIA unforgivable mismanagement. It’s a never ending nightmare for the families of the victims ! https://t.co/4EKmuTKhkq
— Mahira Khan (@TheMahiraKhan) June 4, 2020
سماجی رابطے کی ویب سائٹ ٹویٹر پر اداکارہ ماہرہ خان نے لکھا کہ پی آئی اے کی بد انتظامی نا قابل معافی ہے، یہ لواحقین کے خاندان کے لیے کبھی نہ ختم ہونے والا بھیانک خواب ہے۔
یاد رہے کہ 22 مئی کو لاہور سے کراچی آنے والی پی آئی اے کی پرواز لینڈنگ کے دوران آبادی پر گر کر تباہ ہوگئی تھی جس کے نتیجے میں جہاز میں سوار عملے کے 8 ارکان سمیت 97 مسافر جاں بحق ہوگئے تھے جبکہ 2 مسافر معجزانہ طور پر محفوظ رہے تھے۔
