نیو یارک: (ویب ڈیسک) امریکی مشہور اداکارہ ایلسا میلانو کے 3 کورونا ٹیسٹ منفی آنے کے بعد کورونا اینٹی باڈیز ٹیسٹ مثبت آگیا۔
دنیا بھر میں می ٹو مہم کا آغاز کرنے والی امریکی اداکارہ ایلسا میلانو نے فوٹو شیئرنگ ایپ انسٹاگرام پر آکسیجن ماسک کے ہمراہ اپنی ایک تصویر شیئر کی۔
تصویر کے کیپشن میں انہوں کورونا ٹیسٹنگ کے نظام کو ناقص قرار دیتے ہوئے لکھا کہ کورونا اور اینٹی باڈیز کے مجموعی طور پر 3 ٹیسٹ منفی آنے کے بعد اب میرا کورونا اینٹی باڈیز کا ٹیسٹ مثبت آیا ہے۔
اداکارہ نے پوسٹ میں لکھا کہ 2 اپریل کو دو ہفتے تک شدید بیمار رہنے کے بعد یہ میں ہوں، اس سے پہلے کبھی ایسا نہیں ہوا کہ مجھے سانس لینے میں دشواری کا سامنا کرنا پڑا، سونگھنے کی حس ختم ہوگئی تھی۔
ایلسا میلانو نے مزید لکھا کہ سینے پر بوجھ تھا، بخار بھی کم نہیں ہورہا تھا اور سر میں بھی درد رہتا تھا، یہاں تک کہ مجھ میں کورونا وائرس کی ہر علامت موجود تھی لیکن اس کے باوجود میرے کورونا وائرس کے ٹیسٹ منفی آئے۔
انہوں نے لکھا کہ مارچ کے آخر تک کورونا وائرس کے 2 ٹیسٹ منفی آنے کے بعد میں نے کورونا اینٹی باڈیز ٹیسٹ بھی کروایا لیکن وہ بھی منفی آیا تاہم اس کے باوجود مجھے سکون نہیں مل رہا تھا اور میں بہت مشکل میں تھی آخرکار 4 ماہ ان تمام علامات کے ساتھ رہنے کے بعد میں نے ایک بار پھر کورونا اینٹی باڈیز ٹیسٹ کروانے کا فیصلہ کیا جو مثبت آیا، یعنی کہ میں کورونا وائرس کا شکار رہی ہوں۔
ادکارہ نے کہا کہ میری درخواست ہے کہ ہمارا ٹیسٹنگ سسٹم بہت ناقص ہے اور ہمیں کورونا کے اصل مریضوں کی تعداد کا نہیں پتہ، لہذا تمام لوگ احتیاط برتیں اور ہاتھ صابن سے دھوئیں، فاصلہ برقرار رکھیں، کیوں کہ میں نہیں چاہتی جو میرے ساتھ ہوا وہ کسی اور کے ساتھ بھی ہو جب کہ میں ٹھیک ہونے کے بعد اپنا پلازمہ بھی عطیہ کروں گی تاکہ اس سے کسی کا فائدہ ہوسکے۔
