نئی دہلی: (ویب ڈیسک) بھارت کے مشہور سنگر سونونگم نے پاکستانی گلوکار سجاد علی کو اپنا پسندیدہ گلوکارہ قرار دیدیا۔
گزشتہ روز بھارتی گلوکار سونو نگم نے سوشل میڈیا کی ویب سائٹ انسٹاگرام پر سجاد علی کے ساتھ چند تصاویر شیئر کیں اور ان تصاویر کا پس منظر بتاتے ہوئے کہا کہ تصاویر 19 مارچ کو لی گئی تھیں جب عدیل فاروق ہمیں عاطف علی کے سٹوڈیو کا جائزہ لینے کے لیے لے کر گئے تھے۔
انہوں نے لکھا کہ اتفاق سے وہاں سب سے زیادہ قابل احترام گلوکارو موسیقار اور میرے سب سے زیادہ پسندیدہ سجاد علی بھائی بھی اپنے بیٹے کے ہمراہ موجود تھے۔
سونو نگم نے سجاد علی کی تعریف کرتے ہوئے کہا کہ سجاد علی کی یہ بات بہت اچھی لگی کہ وہ وہاں ہمارا انتظار کررہے تھے تاکہ ہم پہلی بار ملاقات کرسکیں۔ ہم لوگوں نے وہاں ڈیڑھ گھنٹے تک باتیں کیں۔ میں شام کی چند یادگار تصاویر آپ لوگوں کے ساتھ شیئر کر رہا ہوں۔
سونو نگم نے سجاد علی کا گانا ’’کٹنا نئیں‘‘ کو ان کا اور ان کے گھروالوں کا پسندیدہ گانا قرار دیتے ہوئے کہا کہ اس گانے کو ان کی بہن نے بھی کور کیا تھا لیکن اس سے پہلے میں نے سجاد بھائی سے اس گانے کو کور کرنے کی اجازت لی تھی اور انہوں نے نہ صرف اجازت دے دی تھی بلکہ معاوضہ بھی نہیں لیا تھا۔
واضح رہے کہ کچھ روز قبل بھی سونو نگم نے ایک ویڈیو شیئر کی تھی جس میں وہ پاکستان کی ننھی گلوکارہ ہادیہ ہاشمی کا گانا سن کر رو پڑے تھے اور کہا تھا کہ بہت دنوں بعد کسی آواز نے میرے دل کو چھوا ہے۔
