ممبئی: (روزنامہ دنیا) بھارتی اداکارہ اور سپر ماڈل اروشی روتیلا نے کسانوں کے احتجاج کی حمایت کرتے ہوئے کہا کہ کسان ہمارے ملک کی ریڑھ کی ہڈی ہیں اور اپنے حقوق کیلئے لڑ رہے ہیں۔
میڈیا رپورٹ کے مطابق اروشی روتیلا نے شملہ کے دورے کے دوران کہا کہ میں کسانوں کی حمایت کرتی ہوں کیونکہ وہ اپنے حقوق کیلئے لڑ رہے ہیں۔اس سے قبل رواں ماہ بالی ووڈ کے سپرسٹار سلمان خان نے اس معاملے پر کہا تھا کہ صحیح اور سب سے درست چیز ہونی چاہیے ۔
اس سے قبل معروف بالی وڈ اداکار نصیرالدین شاہ نے کہا تھا کہ کسان جو کچھ کہہ رہے ہیں اسے سننے کی ضرورت ہے، مظاہرین کے حق میں بیان دیتے ہوئے ان کا مزید کہنا تھا کہ خاموشی ظلم کا ساتھ دینے کے مترادف ہے۔ بالی وڈ اداکاروں کو تنقید کا نشانہ بناتے ہوئے نصیرالدین شاہ نے کہا کہ وہ اتنا کما چکے ہیں کہ سات نسلیں بیٹھ کر کھا سکتی ہیں، پھر وہ سچ بولنے سے خوف کیوں محسوس کرتے ہیں۔
دوسری جانب متنازع بیانات کے حوالے سے مشہور بالی وڈ اداکارہ کنگنا رناوت نے احتجاج کرنے والوں سے متعلق ایک ٹویٹ کی تھی جس پر انہیں شدید تنقید کا سامنا کرنا پڑا تھا، کنگنا نے مظاہرے میں شریک ایک بزرگ خاتون پر 100 روپے کے عوض احتجاج میں شرکت کا الزام لگایاتھا، بعد ازاں اداکارہ کو اپنی مذکورہ ٹویٹ ہٹانی پڑی تھی۔
