اسلام آباد: (دنیا نیوز) شہر اقتدار کی رونقیں لوٹنے لگیں، لوک ورثہ اسلام آباد میں منعقدہ میوزیکل کنسرٹ میں نوجوان گلوکاروں نے سریلی آواز کا جادو جگایا تو شہری کھنچے چلے آئے۔
مدھر سر، رسیلی اور سحر انگیز گائیکی، لوک ورثہ اسلام آباد میں سجا میوزیکل کنسرٹ، شہریوں کے چہرے خوشی سے کھل اٹھے۔ روایتی موسیقی کے سروں نے ہر کسی کو اپنے سحر میں جکڑ لیا تو نوجوانوں نے جدید موسیقی سے بھی شائقین کو خوب محظوظ کیا۔
اسلام آباد کے باسیوں نے شام موسیقی کے انعقاد کو سراہا، کہتے ہیں ایس او پیز پر عمل کرتے ہوئے کھلی فضا میں ایسی تقریبات کا سلسلہ جاری رہنا چاہیے۔ شہری کہتے ہیں کورونا وبا کے دوران ایسی تفریحی سرگرمیاں تازہ ہوا کے جھونکے کے مترادف ہیں۔
