ممبئی: (ویب ڈیسک) سجاد علی کے سُر بھارتی گلوکارہ شریا گھوشل کے دل کو بھی چُھو گئے، گلوکارہ نے پاکستانی گلوکار کو نئے گانے پر دل کھول کر داد دی۔
شریا گھوشل نے سوشل میڈیا ویڈیو شیئرنگ ایپلی کیشن انسٹاگرام کی پوسٹ میں سجاد علی کی نئی البم آتش کے گانے ’پردیس‘ کو متاثر کن قرار دیا ہے۔
انہوں نے لکھا کہ سجاد علی بے مثال ہے، میں اس گانے کو لوپ پر سن رہی ہوں، ایک لمبے عرصے بعد کسی گانے نے میرے دل کی گہرائیوں تک اثر ڈالا ہے۔
انڈین گلوکارہ نے پوسٹ کے ساتھ پردیس گانے کی میوزک وڈیو کا سکرین شاٹ بھی شیئر کیا ہے۔
یہ پہلی مرتبہ کسی انڈین فنکار کی طرف سے سجاد علی کی مدح سرائی نہیں کی گئی ہے بلکہ اس سے قبل 2020 میں ایک لائیو کنسرٹ کے دوران سونو نگم نے سجاد علی کو سب سے محترم گلوکار اور موسیقار قرار دیا تھا۔
