ممبئی: (ویب ڈیسک) بالی وڈ دبنگ اسٹار سلمان خان نے انکشاف کیا ہے کہ قتل کی پے در پے دھمکیوں نے ان کی زندگی اجیرن کردی ہے۔
ایک تازہ انٹرویو میں اداکار نے دھمکیوں پر بات چیت کرتے ہوئے بتایا کہ ان کو خود بھی دھمکیوں سے ڈر محسوس ہوتا ہے اور اب ان کیلئے یہ بات ناممکن ہوگئی ہے کہ وہ بائیک چلائیں یا ایک اکیلے سفر کریں۔
سلمان خان نے بتایا کہ جب میں ٹریفک میں ہوتا ہوں تو پھر مجھے میری سیکورٹی سے مسئلہ ہوتا ہے، سیکورٹی کی گاڑیاں دوسری گاڑیوں کیلئے مسئلہ بناتی ہیں اور لوگ عجیب طریقے سے مجھے گھورتے ہیں۔
اداکار نے بتایا کہ سیکورٹی کے حوالے سے مجھے جو بتایا جاتا ہے میں اس پر عمل کرتا ہوں اور میں اس میں بہت احتیاط کرتا ہوں، میں ہر جگہ مکمل سیکورٹی کے ساتھ جاتا ہوں۔
واضح رہے کہ بالی ووڈ سپرسٹار سلمان خان کو لارنس بشنوئی گینگ کی طرف سے قتل کی متعدد دھمکیاں ملی ہیں اور ممبئی پولیس نے اداکار کی حفاظت کیلئے انہیں سیکورٹی دی ہوئی ہے۔
