لاہور: (ویب ڈیسک) پاکستان کی سابقہ گلوکارہ اور سماجی کارکن رابی پیرزادہ نے غزہ میں ہونے والی اسرائیلی بمباری پر خاموش رہنے والی ملالہ یوسفزئی سے سوال کرلیا۔
رابی پیرزادہ نے سماجی رابطے کی ویب سائٹ ایکس پر اسرائیلی فوج کی درندگی کی ایک ہولناک ویڈیو پوسٹ کی جس میں اسرائیلی فوجی ایک معصوم فلسطینی شہری پر بلڈوزر چلا کر اُسے کُچل رہے ہیں۔
دل دہلا دینے والی ویڈیو اپنے ایکس اکاوْنٹ پر شیئر کرتے ہوئے رابی پیرزادہ نے سوال کیا کہ کیا دنیا میں کوئی انسان ہے جو ان اسرائیلی درندوں کو روکے؟
رابی پیرزادہ نے شدید برہمی کا اظہار کرتے ہوئے اقوام متحدہ سے مخاطب ہوکر پوچھا کہ یہ سب کیا ہے؟ آخرہم یہ انتہا کا ظلم اور سفاکیت کیسے ہونے دے رہے ہیں؟
اُنہوں نےنوبل انعام یافتہ ملالہ یوسفزئی کے آفیشل ایکس اکاوْنٹ کو ٹیگ کرتے ہوئے پوچھا کہ آپ اسرائیل کے خلاف سنجیدہ احتجاج کیوں نہیں کر رہی؟ کیوں خاموش ہیں؟ آخر اس بےحس دنیا کے ساتھ کیا مسئلہ ہے؟
