لاہور: (ویب ڈیسک) سینئر اداکارہ بشریٰ انصاری نے شاعرِ مشرق علامہ اقبال کے اشعار والی چادر اوڑھ کر اپنی تصویر سوشل میڈیا پر شیئر کردی۔
رپورٹ کےمطابق بشریٰ انصاری نے اپنے آفیشل انسٹاگرام ہینڈل پر پوسٹ کی،تصویر میں بشریٰ انصاری کو چادر اوڑھے دیکھا جاسکتا ہے جس پر اُردو زبان میں چند اشعار تحریر ہیں، اداکارہ نے کہا کہ میں نے رمضان ٹرانسمیشن میں شرکت کی تھی جہاں میں نے ایسی چادر اوڑھی جس پر شاعرِ مشرق علامہ اقبال کی شاعری لکھی ہوئی تھی۔
بشریٰ انصاری نے پوسٹ کے کیپشن میں طنزیہ تبصرہ کرتے ہوئے کہا کہ اب اگر اردو پڑھنی آتی ہوگی تو سمجھ آجائے گا۔
واضح رہے کہ اداکارہ نے اپنی اس طنزیہ پوسٹ کے ذریعے لاہورکے اچھرہ بازار میں گزشتہ ماہ پیش آنے والے خوفناک واقعے کی طرف اشارہ کیا ہے، جہاں مشتعل ہجوم نے عربی حروف تہجی والا لباس پہننے والی خاتون پر توہین مذہب کا الزام لگایا تھا۔
