لاہور: (دنیا نیوز) کلاسیکل موسیقی کی جان اور سریلی آواز کے مالک گلوکار اسد امانت علی خان کو مداحوں سے بچھڑے 18 برس بیت گئے۔
پٹیالہ گھرانے کے چشم و چراغ اور سروں کے بے تاج بادشاہ اسد امانت علی خان 25 ستمبر 1955ء کو لاہور میں پیدا ہوئے، انہیں موسیقی کا فن اپنے والد استاد امانت علی خان سے ورثے میں ملا، لیکن انہوں نے اپنی شناخت الگ سے منوائی۔
اسد امانت علی خان نے اپنی گائیکی کا آغاز 10 سال کی عمر سے کیا، ان کی غزلوں اور کلاسیکل راگ کو عالمی شہرت ملی۔
گلوکار اسد امانت علی خان کو ان کی فنی خدمات کے اعتراف میں صدارتی تمغہ حسن کارکردگی سے بھی نوازا گیا، تاہم ایوارڈ ملنے کے فوری بعد ان کی طبیعت ناساز ہوگئی اور وہ علاج کیلئے لندن چلے گئے۔
اسد امانت علی کو 8 اپریل 2007ء کو 52 برس کی عمر میں دل کا دورہ پڑا جو جان لیوا ثابت ہوا۔
