لاہور: (ویب ڈیسک) پاکستان کے ابھرتے ہوئے اداکار احمد حسن نے اپنی ازدواجی زندگی سے متعلق دلچسپ انکشاف کیا ہے
احمد حسن اور نوشین احمد حسن پاکستانی ڈرامہ انڈسٹری کے معروف اداکار ہیں جو گزشتہ 12 سال سے خوشگوار ازدواجی زندگی گزار رہے ہیں، دونوں کی ملاقات ایک ڈرامے کے سیٹ پر ہوئی تھی اور پھر یہ رشتہ محبت میں بدل گیا۔
اداکار نے نجی ٹی وی کے انٹرٹینمنٹ شو میں گفتگو کرتے ہوئے بتایا کہ یہ میرا روز کا معمول ہے کہ میں سونے سے پہلے بیوی کے پاؤں دباتا ہوں، اس سے اسے سکون ملتا ہے، اور مجھے برکت۔
شو کے دوران احمد حسن نے اپنی بیوی کے ساتھ فرمانبرداری کا اظہار کرتے ہوئے انکشاف کیا کہ وہ روزانہ رات کو سونے سے پہلے اپنی بیوی کے پاؤں دباتے ہیں،’’میں ایک فرمانبردار شوہر ہوں‘‘ اور اپنی بیوی سے اس بات کی گواہی بھی طلب کی۔
نوشین نے مزاحیہ انداز میں جواب دیا کہ ’’ظاہر ہے وہ ایسا کریں گے، آخر وہ میرے شوہر ہیں!‘‘
تاہم، اس بات پر سوشل میڈیا پر مرد صارفین کی طرف سے شدید ردعمل سامنے آیا، کچھ صارفین نے احمد حسن پر تنقید کرتے ہوئے کہا کہ ’’ایسے ذاتی معاملات ٹی وی پر شیئر کرنے کی کیا ضرورت تھی؟‘‘ ایک اور صارف نے لکھا کہ ’’بیوی کی حمایت کرنا اچھی بات ہے لیکن پاؤں دبانا حد سے زیادہ ہے،‘‘ کچھ نے تو یہاں تک کہہ دیا کہ ’’ایسا صرف غیر محفوظ مرد ہی کرتے ہیں۔‘‘
دوسری طرف خواتین صارفین نے جوڑے کے تعلقات کو سراہتے ہوئے کہا کہ یہ محبت کا اصل اظہار ہے، کچھ نے لکھا کہ ’’کاش سب شوہر ایسے ہوتے‘‘۔
