نیودہلی :(ویب ڈیسک) بھارت کی ملیالم فلم انڈسٹری کے 51 سالہ معروف اداکار کلابھاون انتقال کر گئے۔
بھارتی میڈیا کے مطابق بھارتی اداکار کی لاش کوچی میں ان کے ہوٹل کے کمرے سے ملی، وہ فلم کی شوٹنگ کیلئے کوچی میں موجود تھے۔
رپورٹس میں کہا گیا ہے کہ اداکار کو شیڈول کے مطابق کمرہ خالی کرنا تھا تاہم چیک آؤٹ نہ ہونے پر ہوٹل سٹاف نے کمرہ چیک کیا تو اداکار بے ہوش پائے گئے جنہیں فوری طور پر ہسپتال منتقل کیا گیا جہاں ڈاکٹروں نے ان کو مردہ قرار دیا۔
پولیس کا کہنا تھا اداکار کے کمرے سے کوئی مشکوک چیز نہیں ملی ہے تاہم ان کی موت کی وجوہات سامنے نہیں آسکی ہیں اور حتمی رپورٹ پوسٹ مارٹم کے بعد ہی معلوم ہوگی۔
خیال رہے کہ اداکار کلابھاون نواس نے 1995 میں فلمی کیریئر کا آغاز کیا اور کئی فلموں میں اداکاری کے جوہر دکھائے ہیں جن میں ہٹلر برادرز، جونیئر منڈارکے سمیت کئی شامل ہیں۔
