لاہور: (ویب ڈیسک) معروف اداکارہ زارا نورعباس نے مشترکہ خاندانی نظام (جوائنٹ فیملی سسٹم) کی بھرپور حمایت کرتے ہوئے کہا ہے کہ ہمیں پھر سے اس روایت کو اپنانے کی ضرورت ہے، یہی تنہائی، عدم تحفظ اورمعاشرتی خلا کا بہترین حل ہے۔
فوٹو اینڈ ویڈیو شیئرنگ ایپ انسٹاگرام پرایک پوسٹ شیئر کرتے ہوئے زارا نورعباس نے کہا کہ ہماری زندگی میں جوائنٹ فیملی کا کردار بہت اہم رہا ہے، ماضی میں جب خاندان قریب قریب رہا کرتے تھے، پیدل آنا جانا معمول تھا۔
ان کا کہنا تھا کہ سب مل کر کھانا کھاتے اور بچوں کی پرورش میں ایک دوسرے کا بھرپورساتھ ہوتا تھا، تب زندگی کہیں زیادہ آسان لگتی تھی۔
اداکارہ نے مزید کہا کہ موجودہ دور میں ٹوٹتے رشتے، تنہائی اور بچوں کی تربیت جیسے مسائل کا ایک مضبوط اور فطری حل جوائنٹ فیملی سسٹم میں موجود ہے ہمیں چاہیے کہ ہم پرانے خاندانی نظام کو نئے انداز میں دوبارہ زندہ کریں۔
زارا نور عباس کی اس پوسٹ کو ان کے مداحوں کی جانب سے خوب پذیرائی حاصل ہوئی اور سوشل میڈیا پر اس موضوع پر خاصی بحث بھی شروع ہوگئی۔
