لاہور: (دنیا نیوز) سینئر اداکار شمعون عباسی نے اپنی ذاتی زندگی کے تجربات بیان کرتے ہوئے بتایا کہ یک طرفہ محبت نے انہیں شدید تنہائی، ڈپریشن اور زندگی کی مشکلات سے دوچار کیا اور وہ خود اس تلخ حقیقت کی زندہ مثال ہیں۔
شمعون عباسی نے حال ہی میں دنیا نیوز کے مزاحیہ پروگرام ’مذاق رات‘ میں شرکت کی جہاں انہوں نے مختلف معاملات پر کھل کر بات کی۔
اداکار نے کہا کہ وہ تعلقات میں ہمیشہ ناکام رہے ہیں اور انہیں لگتا ہے کہ اس میں ان کی بھی کچھ کوتاہیاں رہی ہوں گی۔
ان کے مطابق وہ اپنے کیریئر کو بنانے میں اس قدر مصروف ہو گئے تھے کہ ان کے قریبی رشتے آہستہ آہستہ ان سے دور ہوتے گئے کیونکہ ہر انسان اپنی زندگی کے لیے بہتر فیصلہ کرتا ہے، جب یہ سب کچھ ہوا تو وہ خود کو ایک ناکام انسان تصور کرنے لگے۔
انہوں نے کہا کہ کوئی بھی انسان تعلقات کے بارے میں کہیں سے کچھ سیکھتا نہیں ہے بلکہ جب وہ کسی تعلق میں ہوتا ہے تو اسی دوران سیکھتا ہے، ان کے ساتھ بھی یہی ہوا، وہ سمجھتے تھے کہ تھوڑی محنت کے بعد زندگی بہتر ہو جائے گی لیکن ایسا کچھ نہیں ہوا اور ان کے قریبی رشتے انہیں چھوڑ کر چلے گئے۔
اداکار کے مطابق جب یہ رشتے ان کی زندگی سے چلے گئے تو وہ بالکل تنہا رہ گئے کیونکہ انہوں نے کبھی سوچا ہی نہیں تھا کہ یہ رشتے ایک دن ان کی زندگی سے چلے جائیں گے اور یہی بات انہیں اندر سے توڑ گئی۔
انہوں نے کہا کہ وہ شدید ڈپریشن میں چلے گئے تھے جس کی وجہ سے ان کی صلاحیتیں ماند پڑ گئیں اور وہ اتنے خاموش اور سنجیدہ ہو گئے تھے کہ لوگ ان سے ڈرنے لگے تھے کہ کہیں وہ کوئی دہشتگرد تو نہیں۔
ان کا کہنا تھا کہ اگر وہ کسی تقریب میں بھی جاتے تو خاموشی سے ایک طرف بیٹھے رہتے اور کسی سے بات نہیں کرتے تھے، جس سے لوگ انہیں مشکوک نظروں سے دیکھتے اور کہتے کہ یہ کون بدمعاش ہے۔
اداکار کے مطابق وہ گوشہ نشین ہو گئے تھے پھر ایک دن ان کے ایک کزن ان سے ملنے کے لیے آ گئے اور انہیں ڈانٹا کہ یہ کیا کر رہے ہو؟ فلمی زندگی گزارنا بند کرو۔
شمعون عباسی نے بتایا کہ کزن کی جانب سے حوصلہ افزائی کے بعد وہ دوبارہ معمول کی زندگی کی طرف لوٹ آئے اور ان کی دوبارہ ترقی کا آغاز ہوا۔
ایک سوال کے جواب میں انہوں نے کہا کہ یک طرفہ محبت کچھ نہیں ہوتی، اس سے انسان خود کو ہی نقصان پہنچاتا ہے اور محبت وہی ہے جو بانٹی جا سکے، اکیلے محبت کر کے کچھ بھی حاصل نہیں ہوتا کیونکہ سامنے والے تک بات نہیں پہنچ پاتی اور اس سے صرف وقت ضائع ہوتا ہے۔
انہوں نے کہا کہ یک طرفہ محبت میں ہم یہی سوچ لیتے ہیں کہ بس جو کچھ ہے یہی ہے حالانکہ دنیا بہت بڑی ہے اور اللہ تعالیٰ نے اس میں بے شمار انسان بنائے ہیں ممکن ہے ان میں سے کوئی آپ کے لیے زیادہ بہتر ہو۔
شمعون عباسی کے مطابق وہ خود اس کی زندہ مثال ہیں، پہلے یہی سوچا تھا کہ یہی منزل ہے اور سب کچھ ختم ہو گیا مگر پھر معلوم ہوا کہ کوئی اور بھی آپ سے کسی اور طرح سے پیار کر سکتا ہے، کچھ لوگ آپ سے محبت مانگتے نہیں بلکہ کہتے ہیں کہ آپ آجاؤ ہم آپ کو محبت دے دیں گے۔
