لاہور: (دنیا نیوز) گلوکار علی ظفر نے سیلاب متاثرین کے لیے خصوصی فنڈ ریزنگ کنسرٹ کرنے کا اعلان کردیا۔
گلوکار کا کہنا ہے کہ کنسرٹ 27 ستمبر 2025 کو الحمرا کلچرل کمپلیکس میں منعقد ہوگا، کنسرٹ سے حاصل ہونے والی تمام آمدنی علی ظفر فاؤنڈیشن کے ذریعے متاثرہ خاندانوں کی بحالی اور امداد پر خرچ کی جائے گی۔
فنڈ ریزنگ کنسرٹ میں علی ظفر کی پرفارمنس کے ساتھ ساتھ دیگر معروف فنکاروں کی سرپرائز شمولیت بھی متوقع ہے، گلوکار وں کے ناموں کا اعلان جلد کیا جائے گا۔
علی ظفر کا کہنا ہے کہ کنسرٹ صرف موسیقی نہیں، بلکہ ایک آواز ہے، کنسرٹ کی ٹکٹس کی فروخت کا آغاز ہو چکا ہے، شائقین بھی اس فلاحی کام میں حصہ ڈالیں جہاں موسیقی امید کا پیغام بنے گی، فنڈ ریزنگ کنسرٹ کی ٹکٹس "ٹکٹ والا" ویب سائٹس سے لی جاسکتی ہیں۔
گلوکار نے کہا کہ آئیں ہم سب مل کر اُن لوگوں کے لیے اُمید کا چراغ بنیں جو آج بھی مدد کے منتظر ہیں، آئیں ان کے ساتھ کھڑے ہوں جنہیں ہماری سب سے زیادہ ضرورت ہے، یہ ایونٹ نہ صرف موسیقی بلکہ پاکستان کی انسان دوست برادری کے لیے بھی ایک اہم موقع ہے۔
