مظفرآباد: (دنیا نیوز) آزاد جموں و کشمیر میں ڈینگی وائرس کے کیسز میں تشویشناک حد تک اضافہ ہو رہا ہے۔
گزشتہ 24 گھنٹوں کے دوران مزید 80 مریضوں میں وائرس کی تصدیق ہوئی ہے، متاثرہ مریضوں کی مجموعی تعداد 381 تک پہنچ چکی ہے۔
ڈینگی کنٹرول روم کے مطابق ڈینگی کے سب سے زیادہ کیسز دارالحکومت مظفرآباد سے سامنے آئے ہیں جہاں اب تک 185 مریض رپورٹ ہو چکے ہیں، اس کے علاوہ ضلع باغ سے 75 اور میرپور سے 83 کیسز سامنے آئے ہیں، ضلع جہلم ویلی سے 4، نیلم ویلی سے 9، سدھنوتی سے 1، حویلی سے 5 جبکہ پونچھ سے 16 کیسز رپورٹ ہوئے ہیں، جبکہ ضلع بھمبر میں اب تک 3 مریضوں میں ڈینگی وائرس کی تصدیق ہوئی ہے۔
ڈینگی کنٹرول روم کے مطابق اس وقت آزاد کشمیر کے مختلف ہسپتالوں میں 16 مریض زیر علاج ہیں، جبکہ 113 مریض صحتیاب ہو کر گھروں کو واپس جا چکے ہیں۔
محکمہ صحت نے عوام سے احتیاطی تدابیر اختیار کرنے اور گھروں کے آس پاس کے علاقوں کو صاف رکھنے کی اپیل کی ہے۔
