اسلام آباد: (دنیا نیوز) وفاقی دارالحکومت اسلام آباد میں ڈینگی کے ممکنہ پھیلاؤ کے پیش نظر اسلام آباد ہیلتھ کئیر ریگولیٹری اتھارٹی نے بڑا قدم اٹھاتے ہوئے ڈینگی ٹیسٹ کی فیس مختص کر دی۔
اسلام آباد کی تمام لیبارٹریز ڈینگی ٹیسٹ کے 1500سے زائد نرخ وصول نہیں کریں گی، اسلام آباد ہیلتھ کیئر ریگولیشنز ایکٹ 2018 کے تحت عوامی مفاد کے پیش نظر تمام ہسپتال، لیبارٹریز اور ان کے کلیکشن سینٹرز جاری نرخ نامہ پر عمل کے پابند ہوں گے۔
آئی ایچ آر اے کے مطابق ڈینگی کے لیے NS-1، IgG، IgM ٹیسٹس پندرہ سو روپے میں ہوں گے، یہ حکم 31 دسمبر 2025 تک نافذ رہے گا، ہر لیبارٹری جو ELISA ڈینگی NS-1، IgG، IgM ٹیسٹس کرتی ہے، اس کا رپورٹنگ کا وقت 24 گھنٹے سے زیادہ نہ ہو۔
نوٹیفکیشن کے مطابق مذکورہ بالا ہدایات/احکامات کی تعمیل کو یقینی بنانے کے لئے تمام پرائیویٹ ہسپتالوں، لیبارٹریز، کلیکشن سینٹرز کا وقتاً فوقتاً آئی ایچ آر اے کے مجاز افسران کی طرف سے دورہ کیا جائے گا۔
کسی بھی پرائیویٹ ہسپتال، لیبارٹری یا کلیکشن سینٹر کی طرف سے مذکورہ بالا ہدایات کی عدم تعمیل پر سزائیں لاگو ہوں گی، آئی ایچ آر اے ایکٹ 2018 اور اس کے تحت بنائے ضوابط کے تحت مقرر کردہ جرمانہ، رجسٹریشن کی منسوخی، خدمات کی معطلی یا مرکز کی مہر بندی ہو سکتی ہے۔
